ଖୋର୍ଦ୍ଧା, ଅଗଷ୍ଟ ୮: ଦିନକୁ ଦିନ ଡିଜିଟାଲ କାରବାର, ସ୍ମାର୍ଟଫୋନ୍, ସୋସିଆଲ ମିଡିଆ, ଅନଲାଇନ୍ ବ୍ୟାଙ୍କିଂ ଓ ଡିଜିଟାଲ ପେମେଣ୍ଟ ଲୋକଙ୍କ ଦୈନନ୍ଦିନ ଜୀବନର ଅବିଚ୍ଛେଦ୍ୟ ଅଂଶ ପାଲଟିଥିବା ବେଳେ ଏହାର ସୁଯୋଗ ନେଇ ସାଇବର ଅପରାଧୀମାନେ ନୂଆ ନୂଆ କୌଶଳରେ ଲୋକଙ୍କୁ ଠକିବାରେ ଲାଗିଛନ୍ତି। ବିଶେଷକରି ଛାତ୍ରଛାତ୍ରୀ, ଯୁବପିଢ଼ି ଓ ଡିଜିଟାଲ ସେବା ଉପରେ ଅଧିକ ନିର୍ଭରଶୀଳ ପରିବାରଗୁଡ଼ିକ ସାଇବର ଠକେଇର ଶିକାର ହେଉଥିବାରୁ ସାଧାରଣ ଲୋକଙ୍କ ମଧ୍ୟରେ ଡିଜିଟାଲ ସୁରକ୍ଷା ସଚେତନତା ବୃଦ୍ଧି କରିବା ଏବେ ପୁଲିସ ପାଇଁ ଏକ ବଡ଼ ଆହ୍ୱାନ ପାଲଟିଛି।
ଏହି ପରିପ୍ରେକ୍ଷୀରେ ଓଡ଼ିଶା ପୁଲିସ ମହାନିର୍ଦ୍ଦେଶକଙ୍କ ନିର୍ଦ୍ଦେଶକ୍ରମେ ରାଜ୍ୟବ୍ୟାପୀ ଆରମ୍ଭ ହୋଇଥିବା ସାଇବର ସୁରକ୍ଷା ସଚେତନତା ଅଭିଯାନର ଅଂଶ ଭାବେ ଖୋର୍ଦ୍ଧା ପୁଲିସ ପକ୍ଷରୁ ଜୟୀ ରାଜଗୁରୁ ଉଚ୍ଚ ବିଦ୍ୟାଳୟରେ ଏକ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଥିଲା। ଛାତ୍ରଛାତ୍ରୀ, ଶିକ୍ଷକ ଓ ଅନ୍ୟ ଅଂଶଗ୍ରହଣକାରୀଙ୍କୁ ବଢ଼ୁଥିବା ସାଇବର ଅପରାଧର ପ୍ରକାର, ଅପରାଧୀଙ୍କ କାର୍ଯ୍ୟପଦ୍ଧତି ଏବଂ ଏଥିରୁ ନିଜକୁ କିପରି ସୁରକ୍ଷିତ ରଖିହେବ ସେ ସମ୍ପର୍କରେ ପୁଲିସ ଅଧିକାରୀମାନେ ସଚେତନ କରିଥିଲେ। ଖୋର୍ଦ୍ଧା
ଆରକ୍ଷୀ ଅଧୀକ୍ଷକ ପରମାର ସ୍ମିତ ପରୋଷତ୍ତମଦାସ ଙ୍କ ନିର୍ଦ୍ଦେଶରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିବା ବେଳେ ରାବିନାରାୟଣ ଭଞ୍ଜ, ଡି.ଏସ.ପି ତଥା ଖୋର୍ଦ୍ଧା ପୁଲିସର ସି.ସି ଆଣ୍ଡ ଇ.ଓ ଦାୟିତ୍ୱରେ ଥିବା ଅଧିକାରୀ ଏବଂ ଧୀରେନ୍ଦ୍ରନାଥ ମଲ୍ଲିକ, ଇନ୍ସପେକ୍ଟର ଅଫ ପୁଲିସ ତଥା ସି.ସି ଆଣ୍ଡ ଇ.ଓ ଅଧିକାରୀଙ୍କ ମାର୍ଗଦର୍ଶନରେ ସଚେତନତା କାର୍ଯ୍ୟକ୍ରମ ଚାଲିଥିଲା। ସାଇବର
ଅପରାଧୀମାନେ ପ୍ରଥମେ ଲୋକଙ୍କ ବିଶ୍ୱାସ ଜିତିବାକୁ ଚେଷ୍ଟା କରନ୍ତି। ପରେ ବିଭିନ୍ନ ଉପାୟରେ ବ୍ୟକ୍ତିଗତ ତଥ୍ୟ, ବ୍ୟାଙ୍କିଂ ସୂଚନା, ପାସୱାର୍ଡ, ଓଟିପି ଭଳି ସମ୍ବେଦନଶୀଳ ସୂଚନା ହାସଲ କରିବା କିମ୍ବା ଠକେଇପୂର୍ଣ୍ଣ ଲିଙ୍କ୍ ଉପରେ କ୍ଲିକ୍ କରାଇବା, ଅଜଣା ଆପ୍ଲିକେସନ୍ ଡାଉନଲୋଡ୍ କରାଇବା ଓ ଟଙ୍କା ପଠାଇବାକୁ ବାଧ୍ୟ କରିବା ଭଳି କାର୍ଯ୍ୟ କରୁଥିବା ସଚେତନତା କାର୍ଯ୍ୟକ୍ରମରେ ପୁଲିସ ଅଧିକାରୀମାନେ କହିଥିଲେ।
ବିଶେଷକରି ଏପି.କେ ଠକେଇ, ନକଲି ସରକାରୀ ଯୋଜନା, ମିଥ୍ୟା ନିବେଶ ପ୍ରସ୍ତାବ, ଡିଜିଟାଲ ଆରେଷ୍ଟ ଠକେଇ ଏବଂ ଅନଲାଇନ୍ ଆର୍ଥିକ ଠକେଇ ସମ୍ପର୍କରେ ଉଦାହରଣ ଦେଇ ଅଂଶଗ୍ରହଣକାରୀଙ୍କୁ ବୁଝାଇଥିଲେ। ଠକମାନେ ଅନେକ ସମୟରେ ଆକର୍ଷଣୀୟ ଅଫର୍, ତୁରନ୍ତ ଟଙ୍କା ପାଇବାର ଲୋଭ, ଭୟ ସୃଷ୍ଟିକାରୀ ମେସେଜ୍, ନକଲି ପରିଚୟ ଓ ମିଥ୍ୟା ଦାବି ମାଧ୍ୟମରେ ଲୋକଙ୍କୁ ମାନସିକ ଚାପରେ ପକାଇଥାନ୍ତି। ଲୋକେ ତରବରିଆ ଭାବେ ନିଷ୍ପତ୍ତି ନେଲେ ଠକମାନଙ୍କ ଜାଲରେ ଫସିବାର ସମ୍ଭାବନା ଅଧିକ ଥାଏ।
କାର୍ଯ୍ୟକ୍ରମର ମୁଖ୍ୟ ବାର୍ତ୍ତା ଥିଲା—‘ରୁହନ୍ତୁ, ଭାବନ୍ତୁ ଓ ଯାଞ୍ଚ କରନ୍ତୁ’। ଅଜଣା ଲିଙ୍କ୍ ଉପରେ ତୁରନ୍ତ କ୍ଲିକ୍ ନକରିବା, ଅଜଣା ଉତ୍ସରୁ ମିଳିଥିବା ଆପ୍ଲିକେସନ୍ ଡାଉନଲୋଡ୍ ନକରିବା, ଅପରିଚିତ ବ୍ୟକ୍ତିଙ୍କୁ ବ୍ୟକ୍ତିଗତ ତଥ୍ୟ ନଦେବା ଏବଂ ଅନଲାଇନ୍ରେ ମିଳୁଥିବା ଆର୍ଥିକ ଅଫର୍କୁ ଯାଞ୍ଚ ନକରି ଗ୍ରହଣ ନକରିବାକୁ ପୁଲିସ ପରାମର୍ଶ ଦେଇଥିଲା।
କୌଣସି ବ୍ୟକ୍ତି, ୱେବସାଇଟ୍, ଆପ୍ଲିକେସନ୍ କିମ୍ବା ଅନଲାଇନ୍ ଅଫର୍ର ସତ୍ୟତା ଯାଞ୍ଚ କରିବା ପରେ ହିଁ କୌଣସି ପଦକ୍ଷେପ ନେବାକୁ ଛାତ୍ରଛାତ୍ରୀ ଓ ଶିକ୍ଷକମାନଙ୍କୁ କୁହାଯାଇଥିଲା।
ସଚେତନତା କାର୍ଯ୍ୟକ୍ରମରେ ଡିଜିଟାଲ ଆରେଷ୍ଟ ଠକେଇ ସମ୍ପର୍କରେ ମଧ୍ୟ ପୁଲିସ ଗୁରୁତ୍ୱର ସହ ଆଲୋକପାତ କରିଥିଲା। ଠକମାନେ ନିଜକୁ ପୁଲିସ ଅଧିକାରୀ, ସରକାରୀ କର୍ମଚାରୀ କିମ୍ବା ଅନ୍ୟ କୌଣସି ତଦନ୍ତକାରୀ ସଂସ୍ଥାର ଅଧିକାରୀ ଭାବେ ପରିଚୟ ଦେଇ ଫୋନ୍ କିମ୍ବା ଭିଡିଓ କଲ୍ରେ ଭୟଭୀତ କରୁଥିବା ଘଟଣା ସମ୍ପର୍କରେ ସତର୍କ କରାଯାଇଥିଲା।
କୌଣସି ଅପରାଧରେ ଜଡ଼ିତ ଥିବାର ମିଥ୍ୟା ଅଭିଯୋଗ ଲଗାଇ ଲୋକଙ୍କୁ ଭୟଭୀତ କରିବା ପରେ ଟଙ୍କା ପଠାଇବା କିମ୍ବା ନିର୍ଦ୍ଦିଷ୍ଟ ଡିଜିଟାଲ ନିର୍ଦ୍ଦେଶ ପାଳନ କରିବାକୁ ଚାପ ପକାଯାଉଥିବାରୁ ଏଭଳି ଫୋନ୍ କଲ୍ରେ ଭୟଭୀତ ନହେବାକୁ ପୁଲିସ କହିଥିଲା। କେବଳ ଫୋନ୍, ଭିଡିଓ କଲ୍ କିମ୍ବା ମେସେଜ୍ ମାଧ୍ୟମରେ କେହି ନିଜକୁ ପୁଲିସ ବା ସରକାରୀ ଅଧିକାରୀ ବୋଲି ପରିଚୟ ଦେଲେ ତାଙ୍କୁ ଅନ୍ଧଭାବେ ବିଶ୍ୱାସ ନକରିବାକୁ ପରାମର୍ଶ ଦିଆଯାଇଥିଲା।
ସ୍ମାର୍ଟଫୋନ୍ ଓ ସୋସିଆଲ ମିଡିଆର ବ୍ୟବହାର ବଢ଼ୁଥିବାରୁ ଛାତ୍ରଛାତ୍ରୀମାନେ ବିଭିନ୍ନ ଅନଲାଇନ୍ ଠକେଇର ସମ୍ମୁଖୀନ ହୋଇପାରନ୍ତି। ଏଣୁ କୌଣସି ସନ୍ଦେହଜନକ ମେସେଜ୍, ଲିଙ୍କ୍, ଆପ୍ଲିକେସନ୍ କିମ୍ବା ଆର୍ଥିକ କାରବାର ସମ୍ପର୍କରେ ସନ୍ଦେହ ହେଲେ ନିଜେ ତରବରିଆ ଭାବେ ପଦକ୍ଷେପ ନନେଇ ଅଭିଭାବକ, ଶିକ୍ଷକ କିମ୍ବା ବିଶ୍ୱସ୍ତ ବୟସ୍କ ବ୍ୟକ୍ତିଙ୍କ ସହ ଆଲୋଚନା କରିବାକୁ ପୁଲିସ ପରାମର୍ଶ ଦେଇଥିଲା ସାଇବର ଠକେଇର ଶିକାର ହେଲେ ଘଟଣାକୁ ଲୁଚାଇ ନରଖି ତୁରନ୍ତ ପଦକ୍ଷେପ ନେବା ଉପରେ ପୁଲିସ ଗୁରୁତ୍ୱ ଦେଇଥିଲା। ଠକେଇ ସହ ଜଡ଼ିତ ଟ୍ରାଞ୍ଜାକ୍ସନ୍ ବିବରଣୀ, ମେସେଜ୍, ଫୋନ୍ ନମ୍ବର, ସ୍କ୍ରିନ୍ସଟ୍ ଓ ଅନ୍ୟାନ୍ୟ ଉପଲବ୍ଧ ତଥ୍ୟ ସୁରକ୍ଷିତ ରଖିବା ସହ ଟଙ୍କା ସମ୍ପର୍କିତ ଘଟଣା ହେଲେ ସମ୍ପୃକ୍ତ ବ୍ୟାଙ୍କ କିମ୍ବା ଆର୍ଥିକ ସଂସ୍ଥାକୁ ତୁରନ୍ତ ଜଣାଇବାକୁ କୁହାଯାଇଥିଲା।
ସେହିପରି ସାଇବର ଠକେଇ ସମ୍ପର୍କରେ ସାଇବର କ୍ରାଇମ୍ ହେଲ୍ପଲାଇନ୍ ନମ୍ବର ୧୯୩୦ରେ ଯଥାଶୀଘ୍ର ଅଭିଯୋଗ କରିବାକୁ ପୁଲିସ ଆହ୍ୱାନ ଦେଇଥିଲା। ଠକେଇ ପରେ ଯେତେ ଶୀଘ୍ର ଅଭିଯୋଗ ଦାଖଲ ହେବ, ସନ୍ଦେହଜନକ ଆର୍ଥିକ କାରବାର ସମ୍ପର୍କିତ ସୂଚନା ସମ୍ପୃକ୍ତ ବ୍ୟାଙ୍କ ଓ କର୍ତ୍ତୃପକ୍ଷଙ୍କ ନିକଟରେ ସେତେ ଶୀଘ୍ର ପହଞ୍ଚିପାରିବ ବୋଲି ପୁଲିସ ପକ୍ଷରୁ କୁହାଯାଇଥିଲା।
ବିଦ୍ୟାଳୟ ସ୍ତରରୁ ସାଇବର ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି କରିବା ଦ୍ୱାରା ଛାତ୍ରଛାତ୍ରୀଙ୍କ ମଧ୍ୟରେ ସୁରକ୍ଷିତ ଡିଜିଟାଲ ଅଭ୍ୟାସ ଗଢ଼ି ଉଠିପାରିବ ବୋଲି କାର୍ଯ୍ୟକ୍ରମ ଆୟୋଜକମାନେ ଗୁରୁତ୍ୱାରୋପ କରିଥିଲେ। କାର୍ଯ୍ୟକ୍ରମରେ ବହୁ ସଂଖ୍ୟକ ଛାତ୍ରଛାତ୍ରୀ ଓ ଶିକ୍ଷକ ଯୋଗଦେଇଥିଲେ। ସେମାନେ ଅନଲାଇନ୍ ଠକେଇ, ସନ୍ଦେହଜନକ ମେସେଜ୍, ଆପ୍ଲିକେସନ ଓ ଡିଜିଟାଲ ଆର୍ଥିକ କାରବାର ସମ୍ପର୍କରେ ବିଭିନ୍ନ ପ୍ରଶ୍ନ ପଚାରିଥିଲେ। ପୁଲିସ ଅଧିକାରୀମାନେ ସେଗୁଡ଼ିକର ଉତ୍ତର ଦେଇ ସାଧାରଣ ଜୀବନରେ କିପରି ସାଇବର ସୁରକ୍ଷା ନିୟମ ପାଳନ କରିହେବ ସେ ସମ୍ପର୍କରେ ବୁଝାଇଥିଲେ।
ବର୍ତ୍ତମାନ ସମୟରେ ପରିବାରର ପ୍ରାୟ ପ୍ରତ୍ୟେକ ସଦସ୍ୟ ଅନଲାଇନ୍ ବ୍ୟାଙ୍କିଂ, ଡିଜିଟାଲ ପେମେଣ୍ଟ, ସ୍ମାର୍ଟଫୋନ୍ ଓ ସୋସିଆଲ ମିଡିଆ ବ୍ୟବହାର କରୁଥିବାରୁ କେବଳ ଛାତ୍ରଛାତ୍ରୀଙ୍କୁ ସଚେତନ କରିବା ଯଥେଷ୍ଟ ନୁହେଁ ବୋଲି ପୁଲିସ ମତ ଦେଇଛି। ଛାତ୍ରଛାତ୍ରୀମାନେ ସାଇବର ସୁରକ୍ଷା ସମ୍ପର୍କିତ ତଥ୍ୟ ନିଜ ପରିବାର ଓ ସାଙ୍ଗ ସାଥୀଙ୍କୁ ଜଣାଇବାକୁ ମଧ୍ୟ ପୁଲିସ ଆହ୍ୱାନ ଦେଇଛି। କୌଣସି ଅନଲାଇନ୍ କାରବାର ସମୟରେ ଭୟ କିମ୍ବା ଲୋଭରେ ପଡ଼ି ତରବରିଆ ନିଷ୍ପତ୍ତି ନନେବା ଏବଂ ଟଙ୍କା କିମ୍ବା ବ୍ୟକ୍ତିଗତ ତଥ୍ୟ ସମ୍ପର୍କିତ କୌଣସି ପଦକ୍ଷେପ ପୂର୍ବରୁ ଏହାର ସତ୍ୟତା ଯାଞ୍ଚ କରିବାକୁ ପୁଲିସ ପରାମର୍ଶ ଦେଇଛି।
ସାଇବର ଅପରାଧର ରୂପ ଦିନକୁ ଦିନ ବଦଳୁଥିବାରୁ ଏହାର ମୁକାବିଲା ପାଇଁ କେବଳ ପୁଲିସର କାର୍ଯ୍ୟାନୁଷ୍ଠାନ ନୁହେଁ, ବରଂ ସାଧାରଣ ଲୋକଙ୍କ ସଚେତନତା ମଧ୍ୟ ଅତ୍ୟନ୍ତ ଜରୁରୀ। ଏହି ଲକ୍ଷ୍ୟରେ ଖୋର୍ଦ୍ଧା ଜିଲ୍ଲାର ବିଭିନ୍ନ ଶିକ୍ଷାନୁଷ୍ଠାନ ଓ ଅନ୍ୟାନ୍ୟ ସ୍ଥାନରେ ଆଗାମୀ ଦିନରେ ମଧ୍ୟ ସାଇବର ସୁରକ୍ଷା ସଚେତନତା କାର୍ଯ୍ୟକ୍ରମ ଜାରି ରହିବ ବୋଲି ପୁଲିସ ପକ୍ଷରୁ କୁହାଯାଇଛି। ସାଇବର ଠକେଇରୁ ବଞ୍ଚିବାର ପ୍ରଥମ ପଦକ୍ଷେପ ହେଉଛି—ତରବରିଆ ନହୋଇ ସତର୍କ ରହିବା, ସୂଚନା ଯାଞ୍ଚ କରିବା ଏବଂ ସନ୍ଦେହ ହେଲେ ତୁରନ୍ତ ସହାୟତା ନେବା।
Subha Khabar is now on Whatsapp
Join and get latest news update delivered to you via whatsapp
Join Now
