ନାବାଳିକା କୁ ଅସଦାଚରଣ; ଦୁଇ ଶିକ୍ଷକ ଅଟକ

ବାଲେଶ୍ବର, ୨୧/୦୭: ବାଲେଶ୍ୱର ଜିଲ୍ଲାର ରାଇବଣିଆ ଥାନା ଅଧୀନରେ ଥିବା ଚମାର ଗାଁ ପି.ଏନ. ହାଇସ୍କୁଲର ଦୁଇ ଶିକ୍ଷକ, ଗଣିତ ଶିକ୍ଷକ ଓ ପ୍ରଧାନ ଶିକ୍ଷକଙ୍କୁ ନବମ ଶ୍ରେଣୀର ଜଣେ ଛାତ୍ରୀଙ୍କୁ ଅସଦାଚରଣ କରିବା ଅଭିଯୋଗରେ ଅଟକ ରଖିଛି ପୋଲିସ।

ଗଣିତ ଶିକ୍ଷକ କୈଳାଶ ଚନ୍ଦ୍ର ବେଜା ଗତ ତିନି ମାସ ଧରି ଅଶ୍ଳୀଳ ଇଙ୍ଗିତ ଓ ନାବାଳିକା ଛାତ୍ରୀଙ୍କୁ ହଇରାଣ କରୁଥିବା ଅଭିଯୋଗ ରହିଛି। ସେହିପରି ପ୍ରଧାନ ଶିକ୍ଷକ ଭବାନୀ ଶଙ୍କର ପାଲ ଛାତ୍ରୀ ଜଣକ ଅଭିଯୋଗ ଆଣିଥିଲେ ମଧ୍ୟ କୌଣସି ପଦକ୍ଷେପ ନେଇ ନଥିବା ଅଭିଯୋଗ ହୋଇଛି।

ସୂଚନା ଅନୁଯାୟୀ, ଗଣିତ ଶିକ୍ଷକ ଛାତ୍ରୀଙ୍କୁ ବାରମ୍ବାର ଅସଦାଚରଣ କରୁଥିଲେ ଓ ତାଙ୍କୁ ପରୀକ୍ଷାରେ ଫେଲ କରାଇଦେବା ଭଳି ଧମକ ଦେଉଥିଲେ। ଛାତ୍ରୀ ପ୍ରଥମେ ଭୟରେ ଚୁପ ରହିଥିଲେ, କିନ୍ତୁ ଆଠ ଦିନ ପୂର୍ବେ ସେ ପ୍ରଧାନ ଶିକ୍ଷକଙ୍କୁ ଏ ବିଷୟରେ ଜଣାଇଥିଲେ।

ତଥାପି, ପ୍ରଧାନଶିକ୍ଷକ କୌଣସି ପଦକ୍ଷେପ ନେଇ ନଥିବାରୁ ଛାତ୍ରୀ ସ୍କୁଲକୁ ଯାଉ ନଥିଲେ ଓ ମାନସିକ ଚାପରେ ରହୁଥିଲେ। ଏହା ପରେ ଛାତ୍ରୀ ତାଙ୍କ ମା’ଙ୍କୁ ଏ ଘଟଣା ଜଣାଇଥିଲେ, ଯିଏ ଜୁଲାଇ ୨୦ ତାରିଖରେ ରାଇବଣିଆ ଥାନାରେ ଲିଖିତ ଅଭିଯୋଗ ଦାଖଲ କରିଥିଲେ। ଅଭିଯୋଗ ଆଧାରରେ, ରାଇବଣିଆ ପୋଲିସ ଉଭୟ ଶିକ୍ଷକଙ୍କୁ ପଚରାଉଚରା ପାଇଁ ଅଟକ ରଖିଛି।