ଭୁବନେଶ୍ୱର :- ପୋଲିସ ଯଦି ନିଜକୁ ଖୋଜିପାରୁନି, ତେବେ ସାଧାରଣ ଲୋକଙ୍କ ସୁରକ୍ଷା ସଙ୍କଟରେ।ଭୁବନେଶ୍ୱରର ୨୫ ବର୍ଷୀୟ ଟ୍ରାଫିକ୍ କନେଷ୍ଟବଳ ଶୁଭମିତ୍ରା ସାହୁ ନିଖୋଜ ହେବା ଓ ପ୍ରାୟ ୧୦ ଦିନ ପରେ କେନ୍ଦୁଝର ଜିଲ୍ଲାର ଘଟଗାଁ ନିକଟରେ ତାଙ୍କ ମରଶରୀର ମିଳିବା, ଓଡ଼ିଶା ପୋଲିସ ପାଇଁ ଏକ ଲଜ୍ଜାଜନକ ଘଟଣା।
ଶୁଭମିତ୍ରା ସାହୁ ୨୦୨୫ ସେପ୍ଟେମ୍ବର ୬ରେ ଡ୍ୟୁଟି ଶେଷ ପରେ ନିଖୋଜ ହୋଇଥିଲେ। ପରଦିନ ତାଙ୍କ ମା’ ଏନେଇ ଥାନାରେ ଏଫଆଇଆର୍ କରିଥିଲେ। ପ୍ରାରମ୍ଭିକ ସନ୍ଦେହ ତାଙ୍କ ସହକର୍ମୀ ଦୀପକ ରାଉତ ଉପରେ ଥିବା ନେଇ ଶୁଭମିତ୍ରାଙ୍କ ବାପା ଜଣାଇଥିଲେ ବି ପୋଲିସ ଦୀର୍ଘ ସପ୍ତାହେ ବ୍ୟାପି ତାଙ୍କୁ ଠାବ କରିବାରେ ଅସମର୍ଥ ରହିଲା।
ସେଇ ସହକର୍ମୀ, କମିଶନରେଟ ପୋଲିସରେ ଜଣେ କ୍ଲର୍କ୍, ଶେଷରେ ସ୍ୱୀକାର କରିଛି ଯେ, ସେ ଶୁଭମିତ୍ରାଙ୍କୁ ଗଳାଚିପି ମାରିବା ପରେ ଶରୀରକୁ ପୋତି ଦେଇଥିଲା। କଥିତଭାବେ, ଏହି ଘଟଣା ତାଙ୍କର ପ୍ରଥମ ସ୍ତ୍ରୀଙ୍କ ସନ୍ଦିଗ୍ଧ ମୃତ୍ୟୁ ସହ ମଧ୍ୟ ମେଳ ଖାଉଛି; ଯାହା ବୀମା ଠକେଇ ପାଇଁ ହୋଇଥିବା କୁହାଯାଉଛି।
କିପରି ୟୁନିଫର୍ମରେ ଥିବା ଜଣେ ଅଧିକାରୀ ରାଜ୍ୟ ରାଜଧାନୀରୁ ନିଜ ବିଭାଗର ନଜର ତଳୁ ଏତେ ଦିନ ଧରି ନିଖୋଜ ହୋଇ ରହିଲେ?
ସେପ୍ଟେମ୍ବର ୧୩ରେ ବିଳମ୍ବିତ ଭାବେ ୨୫ ହଜାର ଟଙ୍କାର ପୁରସ୍କାର ଘୋଷଣା କରାଯିବା ଏବଂ ପରିବାର ଦେଉଥିବା ତଥ୍ୟକୁ ସମ୍ପୂର୍ଣ୍ଣ ଅଣଦେଖା କରିବା – ପୋଲିସ ବିଭାଗର ଅଳସୁଆ ପଣିଆ, ଅବହେଳା ଓ ତାଳମେଳର ଅଭାବକୁ ସ୍ପଷ୍ଟ ଭାବେ ଦର୍ଶାଉଛି।
ସୋସିଆଲ୍ ମିଡିଆରେ #JusticeForSubhamitra ପରି ହ୍ୟାସଟାଗ୍ ସହ ଲୋକଙ୍କ କ୍ରୋଧ ସ୍ପଷ୍ଟ କରୁଛି, ନିଜକୁ ସୁରକ୍ଷା ଦେଇ ପାରୁନଥିବା ପୋଲିସ ଲୋକଙ୍କ ଆସ୍ଥା ହରେଇବାକୁ ବସିଲାଣି।
ଏହା କେବଳ ଅବହେଳା ନୁହେଁ। ବରଂ ବ୍ୟବସ୍ଥାଗତ ବିଫଳତା; ଯାହା ତୁରନ୍ତ ସଜଡ଼ାଯିବା ଆବଶ୍ୟକ। ରିୟଲ-ଟାଇମ୍ ଟ୍ରାକିଂ, ଦୃଢ଼ ଆଭ୍ୟନ୍ତରୀଣ ନିୟନ୍ତ୍ରଣ ଓ ବିଶ୍ୱସନୀୟ ସୂଚନାରେ ଦ୍ରୁତ କାର୍ଯ୍ୟାନୁଷ୍ଠାନ ଅତ୍ୟନ୍ତ ଜରୁରୀ।ଯଦି ପୋଲିସ ନିଜକୁ ଖୋଜିପାରୁନି, ତେବେ ସାଧାରଣ ଲୋକଙ୍କ ପାଇଁ ଆଶା ଆଉ କ’ଣ ଅଛି?
Subha Khabar is now on Whatsapp
Join and get latest news update delivered to you via whatsapp
Join Now
